OBXECTIVO DAS XORNADAS

Coa incorporación das universidades galegas ao EEES,
a crecente mobilidade dos estudantes verase
incrementada, polo que un dos retos que deberá
afrontar a institución universitaria é o da especial
situación do alumnado que debe resolver o problema do
aloxamento lonxe do seu lugar de residencia habitual.

Neste senso, os traballos de investigación
desenvolvidos na UDC dende a Vicerreitoría de
Infraestruturas e Xestión Ambiental xunto co
Departamento de Proxectos Arquitectónicos e Urbanismo
sobre ónde e cómo viven os universitarios na cidade da
Coruña puxeron ao descuberto a poucos metros do Campus
máis dun cento de infravivendas destinadas a
estudantes. Esta patoloxía urbana é o resultado tanto
da presión que se deriva da demanda de aloxamento
universitario como da carencia de políticas públicas
dirixidas a solventar este problema.

O obxectivo destas xornadas é centrar o debate
nesta realidade, abordando a cuestión desde diferentes
perspectivas: a dimensión social da demanda de vivenda
por parte dos estudantes, o papel e a resposta das
cidades frente a esta situación, a importancia de
ofertar ao alumnado espazos onde residir de calidade
e asequibles, así como dar a coñecer os modelos
existentes de xestión, promoción e construción en
países como Finlandia, Alemaña e Reino Unido xunto
coas experiencias españolas relevantes que, dende as
administracións central e autonómicas, foron levadas
a cabo nos últimos anos.